ПО ПРЕДЛОГ НА ССМ

НЕДЕЛА СТАНУВА НЕРАБОТЕН ДЕН

Во услови на Светската здравствена криза, предизвикана од Коронавиросот COVID – 19, се покажа дека повеќе од потребно е Недела да биде неработен ден за сите работници.

По пат на Социјален дијалог со Влада и работодавачите, со денешното гласање во Собранието од страна на пратениците, успеавме да го обезбедиме ова право на работниците.

Едно од главните барања на протестот на ССМ одржан на 12.12.2021 година, денеска е изгласано од страна на Пратениците во Собранието и истото конечно почнува да се применува од 1 јануари 2022 година.

92% од работниците ќе одмараат, а оние 8 % кои работат во дејностите во кои не може да се прекине работниот процес, за работа во недела ќе добиваат најмалку дополнителни 50% додаток на плата за секој поминат час за работа во недела, а синдикатите здружени во ССМ веќе преку колективните договори обезбедија и 100% додаток на плата за работа во недела.

Ова решение е во интерес на граѓаните, неделата треба да биде ден посветен на одмор, ден за поквалитетно време за секој граѓанин на кој тоа му е потребно, ден за семејството, ден за себе.

Претседателот на ССМ, Дарко Димовски истакнува дека во насока на заштита на работничките права и обезбедување на баланс помеѓу работата и семејството, а ССМ во изминатиот период повеќе пати предлагаше ден на неделен одмор да биде недела. Прифатениот предлог на ССМ од страна на Владата конечно е изгласан од страна на пратениците, а ССМ смета дека претставува одличен пример за унапредување на работничките права преку создавање на правна рамка за почитување на демократските вредности.

Заедно стануваме пример за унапредување на работничките права.